د امریکا د بهرنیو چارو وزارت ویاند متیو میلر ویلي، امریکا له طالبانو غواړي چې ددې ډاډ ورکړې، چې د افغانستان له خاورې «ترهګریز» بریدونه نه ترسره کېږي.
ښاغلي میلر پرون شپه ( سه شنبې شپه،د چنګاښ ٢٦) په واشنګټن کې یوې خبري غونډې ته وویل، «له هغوی (طالبانو) سره د تعامل په برخه کې دا زموږ لپاره یو لومړیتوب دی او دوام لري.»
هغه په پاکستان کې د بریدونو په اړه د یوې پوښتنې په ځواب کې وویل، « تر ټولو لومړی، باید ووایم چې د پاکستان خلکو د سخت دریځو او ترهګرو څخه ډیر زیان لیدلی دی. موږ د سیمه ییزو امنیتي ګواښونو سره په مبارزه کې د پاکستان له خلکو او حکومت سره ګډې ګټې لرو.»
له دې وړاندې طالبانو په ځلونو په افغانستان کې د هغو ترهګرو ډلو شتون رد کړی چې د سیمې امنیت ته ګواښ پېښوي.
له بلې خوا طالبانو ویلي چې دوی د تحریک طالبان پاکستان (ټي ټي پي) ملاتړ نه کوي.
خو پاکستاني چارواکو په وار وار افغان طالبان د ټي ټي پي په ملاتړ تورن کړي، او ویلي یې دي چې دا ډله د پاکستان په خاوره کې د «طالبانو تر کنټرول لاندې افغانستان کې له پټنځایونو» خپل بریدونه پلانوي.
تازه، د پاکستان د دفاع وزیر ويلي، اسلام آباد حق لري چې د ګواښونو د شتون په صورت کې په افغانستان کې پر«ترهګريزو» اهدافو بریدونه وکړي.
