طالبان می‌گویند که هیأتی از «نیروهای مرزی» آنان در سفری به ازبیکستان با نیروهای مرزی ازبیکستان دیدار کرده است.
خبرگزاری باختر زیر اداره طالبان نوشته است که در این دیدار درباره «هماهنگی بهتر میان نیروهای مرزی، حفظ مرزهای مشترک و تقویت امنیت» گفت‌وگو شده است.
این در حالی است که ازبیکستان و تاجیکستان همواره از تأثیر ناامنی در افغانستان بر امنیت این دو کشور، ابراز نگرانی کرده‌اند.
رئیس جمهور تاجیکستان هفته گذشته در نشستی گفت که «احساس می‌کند فعالیت گروه‌های شورشی در أفغانستان افزایش یافته است.»
