ظاهر اغبر، سفیر دولت پیشین افغانستان در تاجیکستان، در واکنش به حمایت و دعوت وی به امریکا از سوی تیم بورچت، عضو کانگرس ایالات متحده، از مردم افغانستان و ایستادگی در برابر طالبان گفته است قانون «بدون مالیات دالر برای تروریستان» مسیر آینده ما را هموار می‌کند.
سفیر دوره جمهوریت افغانستان در تاجیکستان امروز، دوشنبه در شبکه اکس از این اقدام عضو مجلس نمایندگان ایالات متحده قدردانی کرده است.
آقای اغبر گفت: «تشکر از شما، تیم بورچت، برای ایستادن در کنار مردم افغانستان در تاریک‌ترین لحظات ملت ما. حمایت بی‌وقفه و تلاش‌های قانونی شما، مانند قانون بدون مالیات دالر برای هراس‌افکنان (طالبان)، مسیرهای جدیدی را برای آینده ما هموار خواهد کرد. ما از تعهد شما به هدف ما قدردانی می‌کنیم.»
این واکنش در حالی است که تیم بورچت، نماینده جمهوری‌خواه مجلس نمایندگان امریکا، از ظاهر اغبر برای سفر به ایالات متحده دعوت کرده است.
او اعلام کرده است که دعوت‌نامه مشابهی را نیز برای امرالله صالح، معاون پیشین ریاست‌جمهوری افغانستان، فرستاده است.
