توماس نیکلاسون، نماینده ویژه اتحادیه اروپا در امور افغانستان، با سراج‌الدین مهرالدین، وزیر امور خارجه تاجیکستان، دیدار و درباره تحولات افغانستان گفتگو کرده است.
وزارت خارجه تاجیکستان با نشر خبرنامه‌ای اعلام کرده که در این دیدار، دو طرف درباره وضعیت افغانستان و راه‌های همکاری برای مقابله با چالش‌ها و تهدیدهای موجود تبادل نظر کرده‌اند.
همچنین، در این نشست بر گسترش روابط دوجانبه میان جمهوری تاجیکستان و اتحادیه اروپا در بخش‌های مختلف تأکید شده است.
تاجیکستان از معدود کشورهای منطقه است که تاکنون روابط نزدیکی با طالبان برقرار نکرده و بارها درباره فعالیت گروه‌های مسلح در شمال افغانستان و قاچاق مواد مخدر ابراز نگرانی کرده است.
