د دغو اوسېدونکو په وینا په دې وروستیو کې د اوبو څاهګان وچ او د نوموړي ولایت اوسېدونکي د څښاک اوبو له کمښت سره مخ شوي دي.
د تالقان ښار اوسېدونکې زرمینه وايي، د اوبو د کمښت له امله له لیرې سیمې اوبه راوړي. هغه د ورځې دوه کیلومتره لاره کچ کوي او د تالقان له زرګران سیمې تر ختیځې پروژې پورې د اوبو راوړلو لپاره ځي.
![](https://amu.tv/wp-content/uploads/2023/04/photo4470034693-1024x576.jpg)
د تخار اوسېدونکې زرمینې وویل: «اوبه د انسان له اصلي اړتیاوو دي، که اوبه نه وي ژوند نشته. موږ په دې وروستیو کې د اوبو له کموالی سره مخ یو که حکومت موږ ته پاملرنه ونهکړي موږ به د خپلو ماشومانو د مړینې شاهد واوسو. د یوه څاڅکي اوبو لپاره له لیرې ځایونو راځو، کله کله پیدا کيږي هغه هم ډېره کمه اندازه.»
د تخار د اوسېدونکو په وینا، د دې ولایت په مرکز کې د څاګانو د وچېدو او د اوبو کچې د ټیټېدو لامل موسمي بدلونونه، وروستۍ وچکالۍ او د اوبو د زیاتو ژورو څاه ګانو کیندل دي.
د تخار یوه اوسېدونکي رحیمالله وویل: «کابو دوې میاشتې کېږي چې د اوبو له کموالي سره مخ یو. سوړ ژمی، د پانګوالو له خوا د ژورو څاهګانو کیندل او سوداګریز مارکېټونه د دې لامل شوي چې ان د اوداسه اوبه ونهلرو. کله کله د خپلو پېردونکو لپاره د دې له امله چې د څښاک اوبه نه لرو له معدني اوبو کار اخلم. دا ډېر ګران راته تماميږي. زموږ په سیمه کې پنځه څاهګان وو چې اوس ټول وچ شوي دي.»
![](https://amu.tv/wp-content/uploads/2023/04/photo4470034701.jpg)
یو شمېر کارپوهان، له اوبو څخه پراخه استفاده، د اوبو د مصرف لپاره د سم پروګرام نشتوالی او د کروندو لپاره د څښاک اوبو کارول ترځمکې لاندې اوبو د کچې د ټیټوالي لاملونه ګڼي.
د چاپېریال ساتنې کارپوه عبدالسمیع خاوري په دې اړه وویل: «د تېر ژمي سخته سړه هوا، له اوبو د اوسېدونکو ناسمه ګټه اخیستنه او په استوګنیزو کورونو د کرنیزو ځمکو بدلېدل د تخار په مرکز تالقان ښار کې د بېمخینې ناوړه وضعیت لامل شوی دی.»
له بلې خوا، په تخار کې د طالبانو ځایي مسوولین ډاډ ورکوي چې د دې ولایت د اوسېدونکو د اوبو د کمښت لپاره یو لړ پروګرامونه لري چې په عملي کېدو سره به یې دا ستونزه هواره شي.